დარასელიას სახელობის თასის ნახევარფინალისტები ცნობილია

“იუვენტუსისა“ და “უოტფორდის“ აკადემიის გუნდებმა ვიტალი დარასელიას თასის მეოთხედფინალური შეხვედრები მოიგეს და ნახევარფინალში ითამაშებენ.

“ილია კოკაია არენაზე“ გამართულ დაპირისპირებაში „უოტფორდის“ 16-წლამდელების მეტოქე “გალათასარაის“ აკადემიის გუნდი იყო. ინგლისელებმა თამაში დამაჯერებლად ჩაატარეს და მეტოქეს დიდი ანგარიშით, 4:1 სძლიეს.

მეორე მეოთხედფინალში, საგურამოში, “იუვენტუსი“ “ლოკომოტივს“ შეხვდა და პირველივე ტაიმში ორბურთიანი უპირატესობა მოიპოვა, შესვენების შემდეგ კიდევ ერთი ბურთი გაიტანა და საბოლოოდ 3:0 მოიგო.

ნახევარფინალური მატჩები 27 აგვისტოს გაიმართება. „იუვენტუსი“ „დინამო თბილისს“ შეხვდება, რომელთანაც ჯგუფური ეტაპის შეხვედრაში 1:3 დამარცხდა, ხოლო “უოტფორდი“ ფინალში გასასვლელად „ვალენსიას“ დაუპირისპირდება.